MALAON AKONG NAWAGLIT SA LANDAS

Malaon akong nawaglit sa landas,

Tunay na liwanag ay di namalas;

Malaong biyaya’y di ko tinanggap,

Ngunit ang pag-ibig N’ya’y hanggang wakas.

Sakali’t ikaw man ay nawawaglit,

Magbalikwas ka’t S’ya”y hanaping pilit;

Awa N’ya’y asahan mong makakamit,

Kung sa kay Jesus ay manunumbalik.

May laging patawad sa tumatanggap,

At sa maniwala ay may liwanag;

Puso mong pinid, sa Kanya’y ibukas,

Si Jesus sa’yo ang S’yang magliligtas.

Sa karimlan mo ay may liwanag ka,

May patawad sa marami mong sala;

Siya’y tanggapin sa puso’t kalul’wa,

May saganang buhay sa piling Niya.