KAILAN NA NGA BA?

Kailan na nga ba ikaw’y nanalangin

At inihayag ang damdamin?

Kailan nagdasal ng mataimtim

Hanggang ang daing ay dinggin?

Kailan na nga ba ligaya’y inangkin

At nang naibsan ang pasanin?

Kailan mo nadamang ikaw’y mahal din

At palaging iibigin?

Kailan na nga ba ikaw ay lumuhod

Bago humiga at matulog?

Kailan natarok na sa pagluhog

S’ya ay laging sumasagot?

Kailan na nga ba paggising, pagdulog,

Ang pagpapala’y ibinuhos?

Kailan mo nga kaya dapat matalos,

Mahal na mahal ka ng Dios?