KUNG ANG BUHAY MO AY GIYAGIS

Kung ang buhay mo sa twina’y giyagis,

At ang puso mo ay laging may hapis,

Alalahanin mo ang Dios sa langit,

May dulot na biyaya at pag-ibig.

Kung mahirap man ang ‘yong kabuhayan,

At ikaw ay parating nalulumbay,

Pag-ibig N’ya’y alalahaning tunay,

Ang lungkot mo’y magiging kasayahan.

Kung ang kapwa ay may kaginhawahan,

At ikaw’y salat sa maraming bagay,

H’wag ikalungkot ang ‘yong kalagayan,

Nalalaman ng Dios ang iyong buhay.

Kung ang dusa’t hapis ang naghahari,

H’wag matakot, S’ya’y kapiling mong lagi,

Ang suliranin mo ay isangguni,

At kahirapa’y magiging l’walhati.